今晚英格蘭足總盃第3圈獨腳戲，阿仙奴主場迎戰列斯聯。「兵工廠」阿仙奴新帥阿迪達帶嚟嘅「6秒法則」，重新激活球隊，就算遇上一代宗師、列斯聯老帥比爾沙亦冇有怕，何況兵工廠一向食住呢支英冠「1哥」，加上主場之利有力贏波晉級，讓半一照捧上盤。

今仗最大睇頭，必屬兩代崇尚逼搶嘅教頭、阿迪達與比爾沙嘅大鬥法，64歲嘅比爾沙近年執教智利國家隊、畢爾包、馬賽、里爾及列斯聯等唔同級別球隊，其獨特嘅風格，甚至吸引咗名帥哥迪奧拿慕名求教，宗師地位毋庸置疑。不過，經過上季大好形勢仍未能升班，列斯聯今季頭號目標依然係重返英超，查實佢哋近5仗僅1勝，狀態麻麻，在兵源有限、升班大過天之下，比爾沙難免會避重就輕。

「兵工廠」新帥阿迪達師承哥迪奧拿，其風格亦略帶比爾沙嘅影子，但佢帶嚟新派嘅「6秒法則」，要求喺每次失去控球權後，附近球員要喺「黃金6秒」之內進行高壓性反搶，其他隊友就喺呢段時間部署防守，即使6秒內搶唔番個波，防線亦大致完成布防，大大減低對手打反擊嘅機會。雖然「達哥」接手後3仗只得1勝1和1負，但從上仗輕取曼聯2比0所見，球員已逐漸適應呢種打法，防守明顯穩陣咗好多，就算今仗或收起奧斯爾、奧巴美揚等主力，重用活力十足嘅祖爾韋洛克、雷斯尼爾遜等小將，相信仍會收到奇效，何況近6次對列斯聯取得5勝1和，擺明格食格，上盤不容錯過。

瑞典神鋒伊巴謙莫域加盟ＡＣ米蘭第一擊！呢名38歲「戰神」回歸意甲掀起熱話，今晚首戰ＡＣ喺聖西路主場迎戰森多利亞，絕對係靚舞台，皆因森多利亞前鋒基安魯卡卡柏里停賽，攻力受損，再加上森多利亞近9場作客輸7場，呢場造就伊巴可以救世主姿態出現，ＡＣ讓一球顯信心，上盤咪錯過。

伊巴謙莫域加盟ＡＣ米蘭後，日前為ＡＣ出戰熱身賽，對地區球隊羅丹斯，伊巴踢咗半場，已經交出1個入波及1次助攻，最終ＡＣ大勝對手9比0。伊巴今場除咗入波同助攻外，亦擔當大佬角色，頻頻指揮隊友走位，猶如球場上主帥。

今場鬥森多利亞係正式比賽，伊巴亦肯定會正選上陣，未計周日賽事，ＡＣ現時在積分榜排11位，17戰6勝3和8負，最大問題係入球數字偏少，只入得16球，平均1場都入唔到1球，伊巴嘅加盟正好加強球隊攻力，而且可提高士氣。事實上ＡＣ人腳唔算差，射手比亞迪克上季射入22球喺神射手榜排第3，仲有蘇索及查漢奴古等好手，只要有伊巴帶番起隊波，下半季非常有睇頭。

森多利亞今場前中後三線都有主力缺陣，前鋒基安魯卡卡柏里兩黃一紅停賽，中場法比奧迪派利及中堅阿歷士費拉利因傷缺陣，對於作客成績唔掂嘅森多利亞更加雪上加霜，ＡＣ上盤穩開。