喺泰國舉行嘅U23亞洲盃，今日進行D組次輪賽事，其中約旦U23硬撼越南U23。越南近年足球水準不斷提升，上屆獲得亞軍有辦你睇，今屆誓要捲土重來，首輪意外打和，今輪不容再失，客勝有計。

越南足球水準近年一日千里，在上屆U23亞洲盃爆冷殺入決賽，喺雪戰中加時輸畀烏茲別克，屈居亞軍雖敗不辱，更彈出「越南美斯」阮公鳳等新星。越南今屆梗係想乘勢威番次，順便爭取東京奧運入場券，上屆成員阮光海仍在陣中，儘管首輪只能打和阿聯酋0比0，同對手表現搶韁、自己未上力有關，而且泰國有好多越南球迷，猶如半個主場，未踢先贏氣勢。

約旦首輪出戰北韓，但佢哋喺領先兩球之下，忽然走晒樣畀北韓圍攻追番粒，若非完場前對手無人看管下近門1碼竟然頂中柱唔入，隨時和波收場，亦反映出佢哋受壓時踢到進退失據嘅情況，今遇實力更強、矢志爭勝嘅越南，凶多吉少，簡簡單單捧越南客勝開齋。

早啲開波嘅同組賽事，阿聯酋U23對北韓U23。阿聯酋首輪賽和越南，演出不俗，從一開波到完場都快速行軍，令越南打唔出水準，未能入波有啲唔抵。北韓近年整體水準呈現下滑，首輪不敵約旦初段猶如發夢，直至落後兩粒先至醒，最終輸1比2，質素麻麻，寧捧主勝。

星期一波少少哋，最適合以小博大，阿King精選條過關3串1畀大家，先講場有得直播嘅意甲，帕爾馬主場迎戰萊切。帕爾馬主場表現不俗，曾經砌低勁旅羅馬，而且萊切近況極沉，錄得3連敗，帕爾馬主勝有1.75倍抵玩到爛。

帕爾馬雖然歇冬後首戰不敵阿特蘭大，但由於係作客，今場返主場又有唔同發揮。雖然帕爾馬今場有巴利拿停賽，但頂替佢嘅艾拔圖加斯更後生，反而增加咗中前場線活力。帕爾馬靠主場搶分，而且佢哋主場對萊切往績有絕對優勢，近6次交手獲4勝1和1負，加上萊切態沉，新年首戰主場死頂烏甸尼斯，但最終喺87分鐘失守，以0比1輸波，嚴重影響士氣，延續歇冬前頹勢，錄得3連敗，相信今場都唔係帕爾馬對手，先揀主勝。

過關先拖隻荷乙阿積士青年隊半場勝，佢哋作客燕豪芬青年隊。兩支傳統班霸嘅青年隊喺荷乙表現各異，燕豪芬青年隊現時排17位，最近6場輸4場，「阿青」近4場全勝，仲要全部半場已經領先對手，今場揀半場客勝啱數。最後法乙羅連安特對卡昂，兩軍上周末都喺法足盃過關，羅連安特今場贏波就可以做1哥戰意高，卡昂首循環主場都輸波，作客更加唔樂觀，主勝穩陣。