U23亞洲盃C組末輪大戰，中國U23硬撼伊朗U23；中國小組頭2仗全敗後已無緣晉級，戰意成疑，相反伊朗機會爭入8強，呢場唔止要爭3分，還要多入波提升得失球差成績，肯定狂攻中國，質素平庸的國足小將難逃一劫，伊朗大勝可期。

中國過往喺U23亞洲盃從未試過挺進淘汰賽階段，今屆球隊喺FC山東技術總監郝偉帶領下，表現亦未見有起色，2戰全敗，提早同2020東京奧運男足資格講拜拜。分組賽首戰面對南韓，中國喺比賽末段先至失守輸0比1，都還可以說唔好彩，不過次戰面對衞冕嘅烏茲別克，中國完全被技術性擊倒，最終0比2吞敗，2仗1球都入唔到，令人懷疑呢班國足小將嘅質素。中國雖然踢法以防守為主，不過久守必失，加上頭號前鋒張玉寧因傷缺陣，而上位擔正嘅楊立瑜亦冇料到，缺乏還手之力嘅情況下，呢場隨時又要捱打。

伊朗小組賽2戰1和1負得1分，出線形勢告急，除要寄望另一場南韓可以擊敗烏茲別克，今場面對中國一定要大勝，希望能靠得失球差成績壓過衞冕之師，取得8強席位。猶幸伊朗球員無論技術或體能都遠勝中國，質素有保證，呢場勢必禁住國足小將嚟砌，伊朗U23大勝可期。截稿前馬會仍未公布U23亞洲盃賽事編號，有冇受注要留意馬會今日公布。

英格蘭足總盃第3圈重賽，曼聯返主場再鬥狼隊。曼聯一向不擅破密集防守，遇上死守球隊，經常老鼠拉龜，領隊蘇斯克查更係近代主場勝率最低嘅紅魔主帥，今仗讓唔起剋星狼隊，讓球客勝咪錯過。

曼聯與狼隊喺月初碰頭悶和0比0，紅魔全場冇腳中龍埋門，係5年來首次在本土賽事錄得如此差劣數據。由於紅魔側重反擊，格連活特、安東尼馬迪爾、拉舒福特等快速前鋒，遇強屢有佳作，但撞正一心死守嘅球隊，即暴露出不擅打陣地戰嘅毛病，經常老鼠拉龜冇碇埋手，甚至空群而出時畀對手打反擊致敗，亦係曼聯成為「劫富濟貧」嘅「羅賓漢」主因。

曼聯上場聯賽雖以4比0大勝諾域治，但同「金絲雀」防守堅曳有關，主帥蘇斯克查自前年年尾接手後，31次帶領曼聯喺主場出擊僅得17勝，勝率得54.8%，係近4任紅魔主帥主場勝率最低一個，而且保羅普巴、麥湯米尼等中後場悍將仲未好番，令防線仍存隱憂。

狼隊上場英超僅能1比1賽和紐卡素，但佢哋不嬲都遇強愈強，今季面對前6名球隊取得2勝3和3負，包括聯賽雙殺曼城。狼隊射手魯爾占美尼斯狀態依然勇猛，快翼艾達馬查奧爾近期大爆發，成為狼隊反擊泉源。翻查往績，狼隊自2018年升上英超後，連盃賽在內近5次對曼聯，取得2勝3和未輸過，絕對唔怕不擅主攻嘅曼聯，受讓必捧讓球客勝。